നഗരവത്കരണം ഹൃദയാരോഗ്യത്തെ ബാധിക്കുന്നതായി വേള്ഡ് ഹാര്ട്ട് ഫൌണ്ടേഷന് റിപ്പോര്ട്ട്. കുട്ടികളുടെ
ആരോഗ്യത്തെയാണ് ഇത് ഏറെ ദോഷകരമായി ബാധിക്കുന്നത് . മുതിര്ന്നവരില് ഹൃദ്രോഗവും പക്ഷാഘാതവും
വര്ദ്ധിക്കാനും നഗരവത്കരണം വഴിയൊരുക്കുന്നു.
ലോക ജനസംഖ്യയുടെ 50 ശതമാനവും ഇന്ന് നഗരങ്ങളിലാണ് ജീവിക്കുന്നത്. ലോകത്തില് ഏറ്റവും കൂടുതല്
നഗരവാസികള് ഉള്ളത് ഗള്ഫ് രാജ്യങ്ങളിലാണ് . ഖത്തറിനാണ് ഇക്കാര്യത്തില് ഒന്നാം സ്ഥാനം. തൊണ്ണൂറ്റി ആറ് ശതമാനം
ആളുകളും ഇവിടെ നഗരങ്ങളില് പാര്ക്കുന്നു . സൌദി അറേബ്യയില് ഇത് 84 ശതമാനമാണ് . ജോര്ദ്ദാനില് 79 ശതമാനവും
യു എ ഇയില് 78 ശതമാനവും ജനങ്ങള് നഗരങ്ങളില് ജീവിക്കുന്നു .
നഗരവത്കരണം ആരോഗ്യത്തിന് ഹാനികരമായി തീരുന്നു എന്ന് ശാസ്ത്രീയമായി തെളിയിക്കപ്പെട്ട സാഹചര്യത്തില്
പരിഹാരമാര്ഗ്ഗം തേടിയില്ലെങ്കില് ഭവിഷ്യത്ത് ഗുരുതരം ആയിരിക്കുമെന്ന് എമിറേറ്റ്സ് കാര്ഡിയാക് സൊസൈറ്റി
ഹൃദ്രോഗനിവാരണ വിഭാഗം തലവന് ഡോക്ടര് നൂഷിന് ബാസര്ഗാനി മുന്നറിയിപ്പ് നല്കുന്നു.
ഹൃദ്രോഗം ഒരു ജീവിതശൈലീ രോഗമാണ് എന്നും അത് സമൂഹത്തിലെ സമ്പന്നരെയാണ് ബാധിക്കുന്നതെന്നും ഉള്ള ധാരണ
തെറ്റാണെന്നും അദ്ദേഹം പറയുന്നു. കൂടുതല് പേര് തിങ്ങി പാര്ക്കുന്ന ഫ്ലാറ്റുകളും മലിനീകരണവും പ്രകൃതി നശീകരണവും
ജീവിതം നരക തുല്യമായി മാറ്റുകയാണ് . |
